Greenland Business School-imi (GBS) ilinniartut Look North peqatigalugu projektimik aallartiteqqammerput. IHM-imi ilinniartut Nunat Tamalaat akornanni, niuernermi pilerisaarinermilu atuarnermi ilinniarpaat, tassani ilaallutik misissueqqissaarneq, pilersaarusiorneq, tuniseriaatsit, nittarsaassinermilu pisut assigiingitsorpassuit ingerlassinaanissai nunarsuarmi tamani tuniniaanermi. Ilinniarneq ukiunik marlunnik sivisussuseqarpoq, atuaqatigiillu arfiniliupput nunatsinnit assigiinngitsuneerlutik.
“IHM-mi ilinniartutut piffissami malinnaasinnaaneq pungaartippara inuillu attaveqaqatigiittarfiini influenceriniillu tuniniaanermut qanoq sunniisarnerat paasisaqarfiginerussallugu” – Sikkersoq Poulsen
Projektip inuit attaveqaqatigiittarfianni, nittartakkakkut, Facebook-imi il. il. qanoq pilersaarusiorneq siammarterinerlu, kiisalu atortut periutsillu suut atorluarneqarsinnaanersut paasisaqarfiginerunissaat siunertarivaa.
Ilisimasat ineriartortinneqarput
Projektip siunertaraa ilinniartup ilinniareernerup kingorna suliffeqarfinni digital marketing iluani sulinernissamut piareersarnissaa. Maanna ilinniartut atuagarsorneq ingerlappaat, projektillu ingerlanerani atuakkat ilikkakkallu misilittagaqarfigilernissai siunertaalluni. Sapaatip akunnerini tulliuttuni marlunni ilinniartut suliffeqarfiit suleriuserlu paasisaqarfiginerunissaanut periarfissiissaaq.